Qan Təhlükəsizliyinin Təmin Edilməsi üzrə Müasir Texnologiyalar

“LABSERVIS LTD” MMC Azərbaycanda laborator diaqnostika və transfuziologiya sahəsində qabaqcıl həllərin tətbiqini davam etdirir.

Bu yaxınlarda Bakı şəhərində yerləşən Respublika Qan Bankında qlobal miqyasda tanınan, yüksək kvalifikasiyalı texnoloji cihaz quraşdırılmış və istifadəyə verilmişdir:

• Roche cobas 5800 — İİV (QİÇS), Hepatit B və C, sifilis və digər transfuziya yolu ilə ötürülə bilən infeksiyaların yüksək həssaslıqla aşkarlanması üçün nəzərdə tutulmuş müasir molekulyar diaqnostika sistemidir. Sistem nəticələrin yüksək dəqiqliyini və etibarlılığını təmin edərək, infeksiyalaşmış donor qanının resipiyentlərə ötürülməsi riskini əhəmiyyətli dərəcədə azaldır və ümumi bioloji təhlükəsizlik səviyyəsini yüksəldir;

• Hamilton Microlab STAR —böyükhəcmli bioloji materiallardan nümunə hazırlanması, nümunənin işlənilməsi üçün dizayn edilmiş tam avtomatlaşdırılmış şəkildə olan robotlaşdırılmış platformadır. Sistem avtomatik pipetləmə, nümunə ayrılması və molekulyar analizlər üçün nümunənin hazırlanmasını xəta etmə riskini azaltmaqla, insan səhvlərini minimuma endirərək laboratoriya məhsuldarlığını əhəmiyyətli dərəcədə artırır.

Bu sistemlərin tətbiqi nəticəsində Respublika Qan Bankında NAT texnologiyası (Nuklein Turşularının Amplifikasiya Testi) əsasında laborator müayinələrin aparılması mümkün olmuş, bununla da virus infeksiyalarının donor orqanizmində anticisimlər formalaşmazdan əvvəl, yəni infeksiyanın ən erkən mərhələlərində yüksək həssaslıqla aşkarlanması təmin edilmişdir.

NAT texnologiyasının tətbiqi “seroloji pəncərə dövrü”nün əhəmiyyətli dərəcədə azalmasına imkan yaratmaqla yanaşı, donor qanının təhlükəsizliyinə nəzarətin daha yüksək səviyyədə təmin olunmasına şərait yaradır.

Bu xüsusilə genişmiqyaslı qan tədarükü prosesində, eləcə də pasiyentlərə transfuziya məqsədilə nəzərdə tutulan qan və qan komponentlərinin müayinəsi zamanı mühüm əhəmiyyət kəsb edir.

Avtomatlaşdırılmış Hamilton Microlab STAR sistemi bu prosesdə mühüm rol oynayaraq nümunələrin yüksək sürətlə işlənilməsini, nəticələrin sabitliyini və çoxsaylı nümunələrlə davamı olaraq işləmə imkanını təmin edir.
 
Bu, xüsusilə hər gün çoxsaylı donor nümunələrinin müayinədən keçirildiyi və laborator iş axınının bütün mərhələlərində maksimum dəqiqliyin tələb olunduğu Qan Bankı mühiti üçün xüsusi əhəmiyyət daşıyır.

Bu cür texnologiyaların tətbiqi aşağıdakı imkanları yaradır: 
— donor qanının təhlükəsizlik səviyyəsinin artırılması;
— infeksion xəstəliklərin ötürülmə riskinin azaldılması;
— laborator iş axınının sürətləndirilməsi;
— laboratoriyanın ötürücülük qabiliyyətinin artırılması; 
— nümunələrin hazırlanması prosedurlarının standartlaşdırılması;
— transfuziologiya və molekulyar diaqnostika sahəsində müasir beynəlxalq və standartlara uyğunluğunun təmin edilməsi.

“LABSERVIS LTD” MMC milli səhiyyə sisteminin inkişafına verdiyi töhfə ilə qürur duyur və göstərilən etimada, eləcə də səmərəli əməkdaşlığa görə Respublika Qan Bankına öz təşəkkürünü bildirir.